|
|
 |
Lacalle Larraga faxistari urrezko domina ken diezaiola exijitu diote Plentziako Udalari
Igorlea: UKBERRI.NET - Data: Astelehena, 2010 Ots, 08 - 10:15 PM
20 Irakurketa
Estatu kolpea, errepresioa eta frankismoagatik kaltetuen Ahaztuak 1936-1977 elkarteak sinadura bilketa abiatuko du aurki Bizkaiko hainbat udalerrietan. Horren bidez, tokian tokiko udal gobernu eta instituzio publikoak behartu nahi dituzte, "egun oraindik bizirik dirauen sinbologia frankista" kentzera. Besteak beste, Bilbon, oraino, Ogasun zein Correos-eko bulegoen eraikinen fatxadan ikus daitezkeen armarriak izan ditu aipagai, gaurko prentsaurrekoan, Ahaztuak elkarteko bozeramaile Martxelo Alvarezek. Hala ere, Bilbon ez ezik, Barakaldon, Santurtzin eta Plentzian ere batuko dituzte sinadurak. Uribe Kostako itsas-hiribilduari dagokionez, Plentziako Udalak "Jose Daniel Lacalle Larraga (espainolez) militar zein hegazkinlari kolpistari eta Francoren Aireko ministroa izandakoari emandako urrezko domina oraindik indarrean" dirauela salatu du Alvarezek. Gauzak horrela, Lacalle Larragari izendapen hori ken diezaiola exijitu dio Isabel Zarauza alkate independentea buru duen Gobernu Taldeari Ahaztuak elkarteak. Argazkian, Martzelo Alvarez Bilbon emandako beste prentsaurreko batean.
|
|
Boltxe: "Boltxe Kolektiboa Romoko gaztetxeari egindako erasoaren aurka"
Igorlea: UKBERRI.NET - Data: Astelehena, 2010 Ots, 08 - 08:58 PM
52 Irakurketa
Des-kontrolen eta beren entzuleen aurka San Bizenteko jaietan izandako eraso basatiaren ostean, beste pertsona talde batek Romoko gaztetxearen aurka aurrekoa bezain faxista izan zen erasoa burutu zuen. Erasoaren egileek pozik alde egin ahal izan zuten, ekintza-erreakzioa-ekintza espiralak bere zikloa bete duela frogatu ostean. Argi utzi nahi dugu Abadiñon HNTtik hurbil dauden pertsonei emandako jipoiek Barakaldon izan zen ikuskizun handiputzaren justifikazio xelebrea ekarri digutela. Era berean, Romoko eraso egileek San Bizenteko erantzun gisa zuritu lezakete beren erasoa. Elkarri mokoka dauden bi multzoei taldekako bortxakeriarengatik egindako apustua aurpegiratzen diegu. Ildo horretan, jai herrikoietako guneetan herri mugimenduaren aurka darabilten eskuadra moduko ekintzak estaltzeko edozelango legitimitate politikoa ukatzen diegu. Argazkian, Des-kontrol Oreretako Landare elkartearen 25. urteurreneko kontzertuan / cc-by-nc-sa Saioa Cabañas - Gauilunak.
|
|
Larunbat honetan ospatuko dituzte inauteriak Sekeko gaztetxean
Igorlea: UKBERRI.NET - Data: Astelehena, 2010 Ots, 08 - 07:09 PM
25 Irakurketa
Larunbat honetarako, otsailak 13, inauteri jaia antolatu du Gazte Asanblada Sopeloztarrak. Ospakizuna 14:30ean hasiko da Lizarre auzoan (Sopelako metro geltokiaren atzealdean) dagoen Sekeko gaztetxean. Ordu horretan bazkaria egingo dute, menuan patatak errioxar erara edo porrusalda, falafel-a piper gorriekin eta postre sorpresa izango direla. Horrekin batera, musika eta jolasak ere egongo dira eta nola ez, mozorro lehiaketa. "Bakoitzak bere gustuko mozorroa aukeratu eta bozka zein nahi duen mezua bidaliko dio, horretarako egongo den mozorroen kutxaren bitartez", azaldu dute neska-mutilek. Giroa berotzeko, trikitilari talde bat izango dute eta, arratsaldearen bukaeran, poteo alaia egingo dute herrian zehar, denak mozorroturik. Hartara, gazte guztiak deitu dituzte inauteri jaian parte hartzera. Bazkariaren prezioa 5 eurokoa da eta aurretik tiketa erosi beharko da. Argazkian, abenduaren bukaeran okupatu zuten Lizarre auzoko (metro geltokiaren atzekaldean) Sekeko errota / © Gazte Asanblada Sopeloztarra.
|
|
Arkaitz Goikoetxea, Aitor Cotano eta Iñigo Gutierrezi auziperatze autoaren berri eman die Garzonek
Igorlea: UKBERRI.NET - Data: Astelehena, 2010 Ots, 08 - 06:43 PM
25 Irakurketa
Getxo zein Algortako Arkaitz Goikoetxea, Aitor Cotano, Iñigo Gutierrez eta beste lau laguni deklarazioa hartu die gaur Baltasar Garzon Espainiako Auzitegi Nazionaleko 5. Instrukzio Epaitegiko magistratuak. Aitor Artetxe eta Asier Borrero algortarrak zein beste lau herritar ezin izan ditu galdekatu epaileak, atxilotu zituztenetik Frantzian espetxeratuta daudelako, Europa Press albiste agentzia espainolak adierazitakoaren arabera. Garikoitz Aspiazu "Txeroki", Jurdan Martitegi eta Aitzol Iriondorekin batera auziperatu ditu uribekostarrak Garzonek, ETAren Bizkaia komandoko kide zirelakoan, 2007 eta 2008 urte bitarteetan hainbat atentatu egitea leporatuta. Argazkian, auzokideak Cotano eta Goikoetxearen irudiak sostengatzen, aurreko batean.
|
|
Etzi helduko da eskualdera Zinegoak
Igorlea: UKBERRI.NET - Data: Astelehena, 2010 Ots, 08 - 05:27 PM
14 Irakurketa
“Canibales” izeneko film laburra eta “Hollywood, Je T´Aime” film luzea egongo dira ikusgai ostegun honetan, otsailak 11, Algortako Villamonte kaleko kultur etxean. Biak ala biak Zinegoak jaialdian izan dira, hau da, Bilboko gay-lesbo-trans zazpigarren nazioarteko zinemaldiaren egitaraua ofizialaren barruan. Emanaldia 20:00etan hasiko da, sarrera dohainik. Hala ere, ez da hori aipatu festibalak eskualdean utziko duen saio bakarra izango. Leioan bi egunetan jarri dituzte proiekzioak: asteazkenean, hilak 10, "Tanjong Rhu" film laburra eta "Hannah Free" film luzea izango dira ikusgai Kultur Leioan. Hurrengo egunean, ostegunarekin, berriz, "El amor/2" film laburra eta "Jay" film luzea proiektatuko dituzte areto berean. Leioako saio biak 20:00etan hasiko dira eta gonbidapenarekin sartu beharko da. Argazkian, Imanol Landa alkateak lagunduta eman du gaur, Algortako saioaren berri, Zinegoak zinemaldiaren zuzendari Roberto Gastonek / © Getxo.net.
|
|
Areetako taberna bateko zerbitzaria atxilotu dute haxixa saltzea egotzita
Igorlea: UKBERRI.NET - Data: Astelehena, 2010 Ots, 08 - 04:48 PM
27 Irakurketa
Getxoko Udaltzaingoak S.A. inizialak dituen Santurtziko 33 urteko gizona atxilotu du, osasun publikoaren kontrako delitua egiteaz akusatuta, zerbitzari lanetan zebilen tabernan gazteei haxixa saltzen zielakoan. Gertaera ostiralean, otsailak 5, jazo zen, 18:30ak aldera, Areetako Santa Ana kalean. Tokiko poliziak zabaldutako bertsioaren arabera, taberna batean, joan-etorriak etengabekoak zirela antzeman zuten udaltzainek. Gazteak arin sartu eta ateratzen omen ziren eta oinez edo inguruan aparkatutako ibilgailuetan alde egiten zuten. Bezero batek eta zerbitzariak barran, bata bestearen aurrean, dirua zehaztu gabeko zerbaiten truke aldatzen zutela ikusi zuen poliziak kaletik, gaineratu dutenez. Irteterakoan geldiarazi zuten bezeroa haxix zati bat aurkitu zioten, ustez erosi berria, Getxoko Udaltzaingoaren arabera. Tokiko poliziek tabernako zerbitzaria atxilotu zuten eta Getxoko Guardiako Epailetzaren esku geratu da. Argazkian, Getxoko udaltzain bat.
|
|
Torturaren kontrako eskualdeko manifestazioa egingo dute ostiralean Leioan
Igorlea: UKBERRI.NET - Data: Astelehena, 2010 Ots, 08 - 04:25 PM
22 Irakurketa
Joxe Arregi Guardia Zibilak atxilotu zuen Madrilen 1981eko otsailaren 4an, eta bederatzi egun geroago, hilaren 13an, "komisariako infernua atzean utzi, baina Carabanchel espetxeko ospitalean sartu behar izan zuten benetan egoera tamalgarrian", Etengabe bitakorak gogoratu duenez. "Bere gorputza ubelduraz eta erreduraz josita zegoen, eta gutxi iraun zuen bizirik. Otsailaren 13 hartako bere hitzek ongi adierazten dute Joxe Arregik pairatu behar izan zuena. 'Oso latza izan da' esan eta heriotzaren marra igaro zuen", gaineratu dutenez. Larunbat honetan betetzen dira 29 urte gertaera hartatik, eta hura gogorarazteko eta torturaren amaiera eskatzeko mobilizazioak deitu dituzte, egun horretarako, Euskal Herri osoan zehar. Besteak beste, Leioan, eskualde mailako manifestazioa egingo dute ostiral honetan, hilak 12, 20:00etan Bulebarretik abiatuta. Hurrengo egunean, herrietan izango dira bateratzeak: Algortari dagokionez, 13:00etan, Telletxe plazan. Argazkian, 2008ko abenduaren 28an torturaren aurkako aldarriak hartu zituen Algortako kaleak.
|
|
Txetxu Fernandez EPPKtik kanpo dagoela baieztatu du AAMk
Igorlea: UKBERRI.NET - Data: Astelehena, 2010 Ots, 08 - 04:06 PM
36 Irakurketa
Txetxu Fernandez algortarrak bere ingurukoei eta Amnistiaren Aldeko Mugimenduari idatzitako gutun batean adierazi duenez, Euskal Preso Politikoaren Kolektiboaren (EPPK) diziplina eta babesetik at kokatu du bere burua eta hemendik aurrera soilik bere izenean jardutea erabaki du, Uribe Kostako AAMk Etengabe bitakoraren bitartez zabaldu duenez. "Gutunean bere egoera eta erabaki honen arrazoiak azaldu, eta eskerrak ematen dizkie orain arte jasotako laguntzagatik", gaineratu du errepresioaren kontrako erakundeak. Fernandez 1992ko maiatzaren 12an atxilotu zuten, eta Legearen arabera 2010eko irailaren 22an amaituko du ezarritako kondena osoa. Hala ere, "El Correo Español"-ek argitaratu zuen artikuluaren arabera, Espainiako Auzitegi Goreneko doktrinaren aplikazioarekin, 2022ko maiatzaren 4ra arte luzatuko bide diote kondena. Preso algortarra urtarrilean eraman zuten Burgosko espetxetik Langraizera, eta egun batzuk beranduago "El Pais" egunkariak Txetxu eta beste bost preso politikok EPPKtik bereizteko idatziren bat sinatua zutela zabaldu zuen. Argazkian, auzokide bat Txetxu Fernandezen argazkia sostengatzen, aurreko batean.
|
|
Jose Luis Segura (EKA): "Adingabekoak Interneten: arriskuak eta aholkuak"
Igorlea: UKBERRI.NET - Data: Astelehena, 2010 Ots, 08 - 03:08 PM
18 Irakurketa
Bihar, otsailak 9, mundu osoan 2010reko Internet Seguruaren Nazioarteko Eguna ospatuko da, Internet Seguru baten aldeko Europako Sareak antolatuta. Aurtengo leloa adingabetuen aldetik Interneten desegokiak diren eduki zein irudien zabaltzearen prebentzioa da, hauek sarearen erabilera sakona egiten dutelako eta arrisku anitz eta garrantzitsuetara arriskatzen direlako. Oso datu kezkagarriak daude ume zein nerabeek egiten duten Interneten erabilerari buruz. Umeen Pornografiaren Aurkako Ekintza GKEak eta Babestu Itzazu Erakundeak, Internet maiz erabiltzen duten 10 eta 17 urte arteko 4.000 neska eta mutili galdetuz, Espainiako Estatu mailan “Umeen segurtasuna eta adingabekoen ohiturak Interneten” izena duen ikerketa burutu dute. Alarmista izan gabe, ikerketa honek kezkagarritzat har ditzakegun emaitzak eman ditu. Argazkian, hainbat neurriren artean nabigazio segurua bermatzen ez duten programak albo batera uztea gomendatzen du Euskal Herriko Kontsumitzaileen Antolaketak (EKA) / cc-by-nc-sa Studioego.
|
|
Agate Deunaren bezperan baserriz baserri ibili dira dozenaka euskaltzale
Igorlea: UKBERRI.NET - Data: Astelehena, 2010 Ots, 08 - 02:14 PM
154 Irakurketa
Pasa den ostegunean, otsailak 4, Agate Deunaren bezperan, santa aitzakiatzat hartuta, Algorta inguruko baserriz baserri ibili ziren egun osoan zehar dozenaka euskaltzale. Algortako Bertsolari Eskolak (ALBE) eta Lauaxeta AEK euskaltegiak bigarren urtez antolatutako ekimenean ohiturak agintzen duen gabonsaria, aginaldoa, eskatu zuten inguruko baserritarrei. "Oles ta oles (mp3), oletan / Nor dabil ordu honetan? / Bertsozaleok, alkar hartuta / bazterrak inkomodetan" abestearekin batera, iaz arte 40 urte baino gehiagoz galdutako usadioa finkatzen aritu ziren ahots lirain eta zatarrez. Hamaika kilometroko ibilbidean, besteak beste, Antonen baserrian izan ziren, jada Algortan esnea saltzen duen bakarra, horretarako 50 behi fin dituela. Berangora ere egin zuten jauzi, "Santa Ageda (mp3)" abestera. Plantatxu bertsolari zenaren baserritik ere pasatu ziren, baita Paulo Errazkinen Astikagane baserritik ere. Horren lurrak Berango, Erandio, Algorta eta Leioa batzen ditu. Aldats pikoan gora ibili izana eskertu zien Errazkinek, aginaldoaz gain kopla zaharrak eman baitzizkien, bata erlijiosoa (mp3) eta bestea neskak gorteiatzekoa (mp3). Argazki gehiago ikusteko sakatu hemen.
|
|
Karmelo Landa aske utziko dute bermea ordainduta
Igorlea: UKBERRI.NET - Data: Astelehena, 2010 Ots, 08 - 12:54 PM
18 Irakurketa
Gara.net agerkari digitalak aurreratu duenez, Karmelo Landa EHUko Leioa eta Erandioko campuseko irakasle eatarra eta ezker abertzaleko kidea aske utziko dute datozen orduetan, aurretik 50.000 euroko bermea ordainduta. Gainera, iturri horren arabera, ez dizkiote jarri Pernando Barrenari eta egunotan libre geratu diren ezker abertzaleko kideei ezarritako debekuak, hain zuzen ere, jardun politikoan aritzea galarazten diena. Iturri horrek dioenez, astero epaitegira joatea, eskatzen zaionean epategietara aurkeztea eta Espainiako estatutik irteteko galarazpena dira jarri dizkioten baldintzak. Argazkian, euskal preso politikoen aldeko elkarretaratzea Leioa eta Erandioko campusean / cc-by-sa Presoen Aldeko Taldeak (PAT).
|
|
Gizonezko bat atxilotu dute Barakaldon bere ama hiltzea egotzita
Igorlea: UKBERRI.NET - Data: Astelehena, 2010 Ots, 08 - 12:47 PM
17 Irakurketa
Gauerdiko 12:10 aldera, SOS Deiak 112 zerbitzuan telefono-deia jaso dute, Barakaldoko etxebizitza batean eztabaida bat izan dela eta emakume bat beharbada hilik zegoela esateko, Eusko Jaurlaritzaren Herrizaingo Sailak zabaldu duenez. Horren berri jaso bezain pronto, Ertzaintzaren agenteak eta anbulantzia medikalizatu bat bidali dituzte bertara. Etxebizitzan 65 urteko emakumezko bat aurkitu dute, soinean arma zuri batez egindako zauriak zituela; osasun langileek hilda zegoela baieztatu besterik ezin izan dute egin. Dirudienez, semeak eman dizkio sastadak biktimari, harekin izandako eztabaida batean. Hilketa horren ustezko egilea, 41 urtekoa, minutu batzuk geroago atxilotu dute handik gertu, eta polizia-egoitza batera eraman dute. Gertaerak konfirmatzekotan indarkeria matxistak Euskal Herrian eraildako bigarren emakumea litzateke. Argazkian, urtarrilaren 20an Elena Cal tolosarraren erailketa salatu zuten Algortan.
|
|
Karmelo Landa espetxez aldatu dute, baina ez dakite non den
Igorlea: UKBERRI.NET - Data: Igandea, 2010 Ots, 07 - 08:57 PM
29 Irakurketa
Espainiako Auzitegi Nazionalak ez du oraindik erabaki Karmelo Landa EHUko Leioa eta Erandioko campuseko irakasle eatarrari espetxealdia beste bi urtez luzatuko dion edo ez. Kezkatuta daude oso Karmelo Landa presoaren senideak. "Larri gaude", adierazi dio "Berria"ri Juan anaiak. Espetxez aldatu zuten atzo Landa, baina ez dakite nora eraman duten. Gaizki ulertze baten ondorioz, ostiralean espetxetik aterako zirela jakin zen ezker abertzaleko kideen artean kokatu zuen Landa egunkari horrek atzoko alean, baina, anaiak azaldu duenez, Auzitegi Nazionalak ez du oraindik erabaki espetxealdia beste bi urtez luzatuko dion edo askatu egingo duen. Argazkian, euskal errepresaliatu politikoen aldeko manifestazioa campusean.
|
|
Jendetza artean aurkeztu dute Oihukatuak musika kolektibo gaztea
Igorlea: UKBERRI.NET - Data: Igandea, 2010 Ots, 07 - 06:37 PM
156 Irakurketa
Pasa den urtarrilaren 30ean, 150 pertsonen aurrean aurkeztu zuten Algortako eta inguruetako Oihukatuak musika kolektibo gazte berria. Ekitaldia Getxoko Txorimalo gaztetxean burutu zuten, Oihukatuen hamabi taldeetatik seik jo zutela. Publikoak Garrasika, Etsi Gabe, Aske, Matarratas, Koka del Rey eta Napalm entzuteko parada izan zuen. Esanak Esan aspaldiko kolektiboaren hutsunea betetzera dator Oihukatuak eta kideen esanetan "musika antikapitalista, anti-S.G.A.E eta antikontsumista egiteko nahia" dute. Dena den, kolektiboa sortzeko bultzada talde bakoitzak bizi dituen zailtasunetatik etorri zen. Izan ere, entseguak egiteko lokalak edota diskoak ateratzen lortzea kontu zailak dira talde gazteentzat. Lehenengo helburu gisa, talde guztiak batuko dituen diskoa atera nahi dute. Aurkezpenaren eta La Koka del Rey eta Garrasika taldeen argazkiak ikusteko sakatu hemen.
|
|
Europako rugbyrik onena Algortako Mamarro tabernan jarri dute ikusgai
Igorlea: UKBERRI.NET - Data: Igandea, 2010 Ots, 07 - 01:09 AM
29 Irakurketa
Atzo abiatu zen Dublinen Sei Nazioen Rugby Torneoa gizonezko maila nagusian. Irlandarrek iazko galtzaileak, italiarrak, hartu eta 29 eta 11 jipoitu zituzten. Algortako Mamarro tabernan zuzenean jarraitu ahal izan zen partida, baita ordu batzuk emandako Ingalaterra eta Galesen artekoa. Kasu horretan, San George-renek dragoia akatu zuten, 30 eta 17ko emaitzaz. Bitartean, Guinness garagardo beltza dastatzeko aukera izan zuten ostatuko bezeroek, inoiz baino salneurri merkeagoan jarrita. Bihar, berriz, Eskozia eta Frantzia arteko lehia emitituko dute Mamarron, 16:00etatik aurrera eta horrela egingo dute torneoko gizonezko maila nagusiko partida guztiekin. Dena den, Europako Rugby Kopatzat har daitekeen torneoa herenegun hasi zen, Irlanda eta Italiako emakumeek jokatutako partidarekin. Gizonezko lehia 1883an hasi bazen ere, emakumeek XXI menderaino, 2001eraino, itxaron behar izan zuten lehiatzeko. Bestalde, mutilek 20 urte azpiko lehiaketa ere egingo dute. Argazkian, Irlandako mutilak iazko garaipena ospatzen / cc-by ArunMarsh.
|
|
| |
|
|
