|
|
 |
Arrigunaga inguruko orube baten egoera "osasungaitza" salatu du PSE-EEk
Igorlea: UKBERRI.NET - Data: Ostirala, 2010 Ira, 03 - 10:04 PM
3 Irakurketa
Algortako Oka kaleko orube baten egoera "osasungaitza" salatu du Getxoko PSE-EEk, "El Correo Español" egunkariaren bidez. Aipatutako ingurua Arrigunaga hondartzatik gertu dago, eta Luis Almansa PSE-EEko bozeramaileak azaldu duenez, "nahiz eta lur-eremua hirigunean egon, normalean egoera negargarrian aurkitzen da, hainbesteko sasitzarekin oihan baten irudia hartzen du eta zikinkeriaren metaketarekin karraskariak agertzen dira". Gainera, azken egunetako beroarekin arazo hori larriagotu egiten delakoan tematuta dabil Almansa, "gogaikarria den kiratsa sortzen delako". Zinegotziaren ustez, Udalak ez du Lurzoruaren Legeak exijitzen duena betetzen, zeinean orubeen jabeei "behartu egiten die beharrezko osasun eta segurtasun egoeran mantentzea". Argazkian, Algortako Arrigunaga hondartza.
|
|
Asel Luzarragaren askatasuna aldarrikatuko dute asteartean
Igorlea: UKBERRI.NET - Data: Ostirala, 2010 Ira, 03 - 09:49 PM
12 Irakurketa
Asel Luzarraga musikari, idazle eta Euskal PEN Klubeko zuzendaritzako kidearen aurkako auziaren epaian errudun jo dutela zabaldu zen atzo. Arma eta Lehergailuen Kontrolerako Legea urratzea leporatu diote. Hala ere, Aselen sostengu taldeek azaldu dutenez, bere etxean ez zituzten ez armarik ezta lehergailurik aurkitu eta hori dena polizi-muntaia baino ez da, hortaz. Izan ere, bermeotarra Maputxe herriaren lurretan bizi da eta haiekiko elkartasuna behin eta berriz adierazi du. "Jarrera hori zigortu nahi izan dute eta hori dela eta errudun dela erabaki dute", azpimarratu dute Aselen sostengu taldeek. Aselaskatu.org webgunean epaiketaren berri eman dute eta asteartera arte zergatik zigortu duten eta zein izango den zigorra ezingo dutela jakin azaldu dute. Baliteke espetxeratzera ez bidaltzea, baina bai Txiletik kanporatzea: "Txileko Gobernuak helburu hori hasieratik bilatu du eta beraz oso posiblea da azkenean kanporatzeko erabakia hartzea". Horregatik, asteartean, hilak 7, 19:00etan Bilboko Plaza Borobilean egingo duten kontzentrazioan parte hartzera deitu dute. Argazkian, Aselen alde egindako elkarretaratzeetako bat, atxilotu zutenean / © Askapena.
|
|
Bost gazte atxilotu dituzte Lutxanako metro geltokian lapurtu dutelakoan
Igorlea: UKBERRI.NET - Data: Ostirala, 2010 Ira, 03 - 05:49 PM
22 Irakurketa
Gaur goizaldean 20 eta 38 urte bitarteko bost gazte atxilotu ditu Ertzaintzak Bilbon, Erandioko metro geltoki bateko txartel-makinak bortxatu dituztelakoan. Herrizaingo Sailak zabaldu duenez, goizaldeko ordu biak aldera, Ertzaintzak txanoak zeramatzan gazte talde bat Lutxanako metro geltokiko txartel-makina batzuk bortxatzen ibili direneko abisua jaso du. Ustezko lapurreta egin ostean, turismo batean ihesi egin ei dute horiek. Horren aurrean, Ertzaintzak zaintza dispositiboa ezarri eta gutxira Bilbon ustezko lapurren autoa atzeman du. Autoa Maria Diaz de Haro kale inguruan geldiarazi dute poliziek eta barruko bost gazteak identifikatu ostean, ibilgailuan txanponez beteriko hainbat poltsa atzeman dute zenbait txanoekin batera, bertsio ofizialaren arabera. Ertzainek identifikatutako bost gazteak atxilotu dituzte ustezko lapurretagatik.
|
|
Atheticeko emakumeen lehen taldeak aurkezpena egingo du bihar Artean
Igorlea: UKBERRI.NET - Data: Osteguna, 2010 Ira, 02 - 07:51 PM
38 Irakurketa
Athleticeko emakumezkoen lehen taldearen aurkezpen ofiziala bihar, ostiralean, egingo dute babeslea den Leioako Artea merkataritza gunean. Ekimena aipatu zentroko kristal plazan izango da arratsaldeko 6:30ean, jokalariekin batera talde teknikoa ere bertan izango dela, klubak jakinarazi duenez. Iazko denboraldian Espainiako Ligan hirugarren postuan gelditu ostean, gogor hasi dira aurten lehoi emeak, izan ere, abuztuan jokatutako zazpi lagunartekoetatik bi baino ez dituzte galdu. Igandean, berriz, 2010-11 Ligan estreinatuko dira Eibarren kontra Lezaman jokatuko duten partidan. Argazkian, Athletic Clubeko emakumezkoen lehen taldeko argazki ofiziala / © Athletic Club.
|
|
Bi aste barru Erandion manifestatuko dira ertzainak, Ernek deituta
Igorlea: UKBERRI.NET - Data: Osteguna, 2010 Ira, 02 - 07:14 PM
28 Irakurketa
Ertzaintzako Erne sindikatua hilaren 17an mobilizatuko da Erandioko ertzain-hirian, polizi-gorputz horretako lanpostu kopurua handitu dadin eskatzeko. Aipatu manifestazioa egitarau zabalago baten barruan deitu du sindikatuak. Izan ere, bihar zortzi, hilak 10, Eusko Jaurlaritzaren aurrean elkarretaratuko dira eta urriaren 1ean ere Eusko Legebiltzarraren parean arituko dira. Erneren aburuz, Rodolfo Aresek "lantaldea handitzeko ezezkoa" eman du behin eta berriro, tartean ertzainen %18k eskolta lanetan edo Terrorismoaren Aurkako Unitateko beharretan diharduen bitartean. Horrek "pertsonalaren gabeziak" sortu ei ditu kalean eta horrelakoek estaltzeko atsedenean dauden ertzainak "etengabe" lanera deitzea ekarri dute, polizi sindikalisten ustez. Horretaz gain, bere sokako ertzainei lanposturik hoberenak gordetzea lepoartu diote Aresi. Argazkian, Lopez lehendakaria eta Ares Herrizaingo sailburua Erandioko ertzain-hirian pasa den maiatzaren 16an / cc-by Irekia-Eusko Jaurlaritza. Irekia.net - Eusko Jaurlaritza.
|
|
Getxo Kiroletako ikastaro berrietan izen emateko epea zabalik dago
Igorlea: UKBERRI.NET - Data: Osteguna, 2010 Ira, 02 - 06:25 PM
31 Irakurketa
Getxo Kirolak erakundeko ikastaroetan izena eman nahi duenak datorren asteazkenera arte, irailak 8, tramiteak hasteko aukera izango du. Izan ere, data horretara arte, ordena erabakitzeko zozketan parte hartzeko zenbakiak banatuko dituzte erabiltzaileen arreta bulegoetan. Gainera, azken urteotan bezala, sendiko abonamendua dutenek zenbaki bana hartu behar izango dute. Zozketa irailaren 9an izango da goizeko 10etan Fadurako kiroldegian. Ondoren, izena emateko egunak eta orduak zehaztuko dituen zerrendak Algortako Fadura eta Itzubaltzeta / Romoko Gobela kiroldegietako iragarki-tauletan zein udal webgunean argitaratuko dira. Gauzak horrela, lehenengo matrikulazioak irailaren 13an egingo dira. Tramite eta ikastaro guztiak liburuxka honetan (pdf) azaltzen dira. Argazkian, Gobela kiroldegiko instalazioetako bat.
|
|
Plentziako ezker abertzalea: "Gure ondasun arkeologikoa arriskuan?"
Igorlea: UKBERRI.NET - Data: Osteguna, 2010 Ira, 02 - 06:00 PM
29 Irakurketa
Plentziako Edari Zahartzearen Itsaspeko Laborategia (EZIL) kokatzeko lanak laster hasiko dira. Hori dela eta, Udalak obra horiek jarraitu eta ikertuko dituen arkeologo bat kontratatzeko asmoa duen jakin nahi genuke. Laborategiaren kokalekuan, aurretik ere, topatu izan dira balio arkeologikoa izan duten tresna desberdinak (horien artean, gaur egun herriko museoan aurki ditzakegun hiru aingura, 500 eta 200 urte ingurukoak). Gainera, inguru horri buruzko informazioa bilduta dago, eta mendeetan zehar ontzi desberdinen ainguraleku bezala erabilia izan zen. Beraz, obra horien garapenean urpeko arkeologo adituek parte hartu beharko luketela uste dugu, lehen aipatu dugun bezala, ager daitezkeen aurkikuntzen jarraipena eta ikerketa zehatza egiteko. Azkenik, proiektu horren inguruan informatuak egotea gustatuko litzaigukeela azpimarratzen dugu. Irudian, EZIL proiektuaren diseinu bat / © Plentziako Edarien Zahartzearen Itsaspeko Laborategia (EZIL).
|
|
Sopelako aireko inauteria izango da larunbatean Barinatxe hondartzan
Igorlea: UKBERRI.NET - Data: Osteguna, 2010 Ira, 02 - 05:52 PM
28 Irakurketa
Etzi, larunbatean, Getxo eta Sopela artean dagoen Barinatxe hondartzan Sopelako XII. aireko inauteria antolatuko du Airetik hegaldi askeko taldeak. Aipatu ekitaldia parapentean egindako mozorro lehiaketa eta erakustaldia da. Aire emanaldia arratsaldeko 15:30ean hasiko da hondartzako itsaslabarreko pasealekuan. Sariak hiru irabazleen artean banatuko dira: lehenengoari 300 euro, bigarrenari 200 euro eta hirugarrenari 100 euro. Lehiaketan parte hartzeko izen ematea doakoa izango da eta saria irabazi ahal izateko, "nahitaezkoa da mozorro batekin hegan egitea", adierazi dute antolatzaileek. Gainera, fotografia lehiaketa ere egingo dute. Horretan irabazleak 100 euro eta bigarrenak 50 euro irabaziko dituzte. Egun osoan zehar janaria eta edaria izango da mozorrotuta agertzen den guztiarentzat. Gaua heldutakoan, DJ Tito eta Masiompa Fusion taldeak arituko dira. Argazkian, iazko aireko inauteria / © Airetik.
|
|
Amaiur eta aurresku zein bakailao txapelketak izango dira Ondizko jaietako osagarri nagusiak
Igorlea: UKBERRI.NET - Data: Osteguna, 2010 Ira, 02 - 05:18 PM
35 Irakurketa
Bihar, ostiralarekin, abiatuko dira Ondizko jaiak, Udalaren Kultur Arloak zuzenean azpikontraten bitartez kudeatzen dituen Leioako auzo jai bakarrak, alegia. Jai batzordearen hutsunean, Ondizko urteroko egitarau ia berbera ekarriko dute aurten, lehenengo eguneko trikipoteoa edo igandeko erreskate txakurren erakustaldia bidean gelditu eta musikariak aldatu direla. Halere, azkenean urtero gertatu bezala, jai giro alaitsua nagusi izango da Ondizko jaietan. Besteak beste, Aurresku txapelketak mende erdira heldu izanak, ohiko bakailao txapelketak, Amaiurren erromeriak eta Leioako Waterpolo taldeak kudeatutako txosnak auzotarrak eta inguruko herrietako biztanleak erakarriko dituzte. Argazkian, Bizkaiko Aurresku Txapelketaren 50. urteurrena izango da igandean / © Kultur Leioa.
|
|
Uda Leioan eman duten Saharako bost umeak agurtuko dituzte bihar
Igorlea: UKBERRI.NET - Data: Osteguna, 2010 Ira, 02 - 04:35 PM
29 Irakurketa
Fath Sahararekiko elkartasun elkartearen eta Leioako Udalaren ekimenez, udalerrian uda eman duten Saharako umeei adio esateko festa egingo dute bihar. Ekimena Euskal Etxeen plazan izango da, arratsaldeko 18:30ean, eta besteak beste magoak eta pailazoak izango dira bertan. Lemam, Salem, Mufida, Ahjeb eta Sidahmed-ek hilabete bi pasa izan dituzte Leioako bost sendirekin, umeen artean ohikoak diren igerileku eta hondartzetarako txangoak bezalako udako ekintzak egin dituztela. Baina, horretaz gain, "eurentzat esanahi berezia izan dute egun hauek, urtean zehar duten bizimodua kontuan izanda oporraldi hau izugarrizko opari izan da eurentzat", udal iturriek azaldu dutenez. Izan ere, Saharan bizi behar izaten duten egoera "oso gogorra da urtean zehar hainbat beharrizan dituztelako, baina uda aldean areagotu egiten da tenperatura altuak direla eta". Argazkia: © Leioa.net.
|
|
Igeretxe hoteleko nagusia "moobing" egiteagatik auzitara eraman du Lan Ikuskaritzak
Igorlea: UKBERRI.NET - Data: Osteguna, 2010 Ira, 02 - 03:44 PM
35 Irakurketa
Algortako Igeretxe hotelaren nagusiak lan jazarpen delitua egin duenetz eta horretaz salatuko duen aztertuko du datozen asteotan Bizkaiko Fiskaltzak. Izan ere, CCOO sindikatuak jakinarazi duenez, pasa den otsailean hoteleko harreragileak salaketa aurkeztu zuen Bizkaiko Lan Ikuskaritzan. Bertan, nagusiak egiten ei zion etengabeko lan jazarpenaren berri eman zuen emakumeak, 2007tik Igeretxen lan egiten duena. "Moobing"-aren ondorioz, hainbat hilabeteko baja hartu eta tratamendu psikologikoa jaso behar izan zuen, egindako salaketaren arabera. Gainera, hainbat lankidek berretsi zuten beharginaren denuntzia, haiek ere bestelako salaketak jarrita. Ikuskaritzak enpresako ordezkariari hitzordua eman zion hainbat alditan, baita agiriak bidali baina hark ez zuen jaramonik egin. Hori dela eta, Fiskaltzara igorri dute auzia. Argazkian Igeretxe hotela / © CCOO Euskadi.
|
|
Merkealdien azoka egingo dute asteburuan Sopelan
Igorlea: UKBERRI.NET - Data: Osteguna, 2010 Ira, 02 - 02:28 PM
29 Irakurketa
Sopelako Salerosleen Elkarteak, Udalaren laguntzarekin, denboraldi amaierako azoka antolatu du asteburu honetarako, bihar, ostirala hasi eta igandera arte, alegia. Gure Merkadillo (sic) deitutako azoka hori Udaletxeko plazan jarritako karpa batean izango da. Bihar, ostiralean, arratsaldeko 4etatik 8etara egongo da zabalik. Larunbatean, berriz, goizeko 10etatik arratsaldeko 8etara eta igandean, berriz, 10:00etatik 14:00etara. Antolatzaileek adierazi dutenez, "azoka sopeloztarren bilgune izango da eta bertara gerturatzen direnek prezio berezian erosi ahal izango dituzte hainbat artikulu: haur zein helduentzako moda-gaiak, oinetakoak, bitxiak zein oparitzeko artikuluak. Azokak garrantzia hartu du auzotarren artean eta jendetza biltzen du beti". Argazkian, Gure Merkadillo delako azokaren aurreko edizioa / © Joseba Zubiaur - Sopelako Udala.
|
|
Bihar hasita iraileko ostiral guztietan musikarekin hitzordua izango dute Erandioko auzotarrek
Igorlea: UKBERRI.NET - Data: Osteguna, 2010 Ira, 02 - 02:14 PM
30 Irakurketa
Erandioko Gazteria Zerbitzuak hainbat musika kontzertu antolatu ditu iraileko ostiral guztietan dixie, jazz, blues, eta abarreko estiloak konbinatzen dituzten bandekin. Ekitaldiak itsasadar ondoko Txurruka pasealekuaren toki berrian izango dira arratsaldeko 8etatik aurrera. Ostiral honetan, irailak 3, Marmara Dixieland Band taldeak joko du. Talde horrek jazz tradizionala jorratzen du, New Orleansekoa eta swing-a bereziki. Hurrengo astean, irailaren 10ean, Euskal Herrikoa izan arren New Orleanseko musika egiten duen Mac Jeara’s Band taldeak hartuko dio errelebua aurrekoari. Horiek, aurrekoak bezala, eszenatokian nahiz marching band (hots, kaleetan zehar jotzen ibili) jardun daitezke jazz estiloa jorratuz. Hirugarren emanaldian, irailaren 17an, Le Soul talde bizkaitarrak soulfunky estiloarekin arituko da Erandion. Azkenik, irailaren 24an, Jazz Fusion Deluxe taldeak emango dio amaiera musika emanaldiari. Banda honek rock’n’rolla, jazz sesioa, funk edota reggaea eskaini dezake txiste, antzerki eta beste hainbat gauzekin batera. Argazkian, Mac Jeara's Bandek orain dela hiru urte jo zuen Astrabuduan / © Mac Jeara’s Band.
|
|
Bost gazte atxilotu dituzte Getxon fruta-denda batean lapurtu dutelakoan
Igorlea: UKBERRI.NET - Data: Osteguna, 2010 Ira, 02 - 01:52 PM
43 Irakurketa
Gaur goizaldean, 18 eta 24 urte bitarteko bost gazte atxilotu ditu Ertzaintzak Getxo udalerriko fruta-denda batean lapurtu dutelakoan. Herrizaingo Sailak zabaldu duenez, goizaldeko ordu biak aldera, Ertzaintzako patruila batek Avanzada inguruan zebilen turismo bat geldiarazi du ezohizko maniobrak egiten ibili delakoan. Auto barruko bost gizonezkoak identifikatu ostean, kotxean zizelak, suhatzak, aizkora bat, bihurkinak, eskularruak eta txanpon ugari zeukan poltsa bat atzeman diete poliziek. Momentu horretan, ertzainek Getxoko fruta-denda batean indarkeriazko lapurreta bat izan dela eta testigu batek hainbat gazte tokitik ihesean ikusi dituela jakin dute, bertsio ofizialaren arabera. Polizia iturriek adierazi dutenez, ertzainek beharrezko egiaztapenak egin eta identifikatutako bost gazteak atxilotu dituzte ustezko lapurretagatik.
|
|
Mundu osoko doinuak ekarriko ditu udalerrira Getxo Folk jaialdiak
Igorlea: UKBERRI.NET - Data: Osteguna, 2010 Ira, 02 - 01:31 PM
32 Irakurketa
Gaur zortzi hasi eta hilaren 12ra arte, munduko musikak protagonista bilakatuko dira XXVI. Folk Getxo BBK jaialdian. Marta Herrera talde antolatzailearen kideak azaldu bezala (mp3), besteak beste, Oysterband, Mahala Raï Banda, Laydsmith Black Mambazo eta Xabi Aburruzaga portugaletetarra arituko dira jaialdian. Horiez gain, beste zazpi talde ere jardungo dira eta, horien eskutik, Itzubaltzeta / Romo eta Areeta kulturen arteko jaigune bilakatuko dira irailaren 9tik 12ra. Egitarauan, musika emanaldiez gain, bestelako jarduerak daude: Bidezko Merkatua, Munduko Terraza eta kaleko banden desfileak besteak beste. Bestelako jarduerak, ordea, doakoak izango dira. Hainbeste izen entzutetsuen artean jaialdian ez galtzeko moduko saio-gida egin du Koska irratiko Munduko Sustraiak irratsaioak (mp3). Azkenik, aurreko urteotan bezala jaialdia "arrakastatsua" izatea espero du Getxoko Udalak, Josu Loroño zinegotziak aitortu bezala (mp3). Argazkian, larunbatean Laydsmith Black Mambazo talde afrikarrak joko du / © Getxo.net.
|
|
| |
|
|
